මෙහි කංසා භාවිතය සපුරා තහනම්.

මෙහි කංසා භාවිතය සපුරා තහනම්.
------------------------------------------------------------

හේතු ත්‍රෛලෝක්‍යවිජයාගෙං අසා දැනගන්න.

කංසා..එහෙමත් නැත්නං ගංජා.. සාමාන්‍යයෙන් අපේ රටේ ප්‍රසිද්ධියේ කතා කිරීමට මැලි වෙන සෑහෙන පස්ස ගහන මාතෘකාවක්.අපේ රටේ ඇති තහනම නිසාම අඩුවෙන්, නමුත් හොර රහසේ කතාබහට ලක්වෙන වෙනමම විෂය පථයක්.
බහුතරයක් අය කංසා කිව්ව ගමං දන්නේ අර ලෝක ප්‍රසිද්ධ රෙගේ ගායක බොබ් මාලේ මත්වෙන්න බොන දුම විදියට.
මෑතකාලීනව මේ මාතෘකාව යළිත් කරළියට එන්නෙ ආචාර්ය වසන්ත සේන වැලිඅංග මහතා ලියපු "ත්‍රෛලෝක්‍යවිජයා" නම් පොතෙන්.

"ත්‍රෛලෝක්‍යවිජයා" .. ඒක සමහරකුට හුරු නමක් වෙන්න හැකි වුවත් සමහරෙකුට නුහුරු නමක්.නමුත් ත්‍රෛලෝක්‍යවිජයා කියන්නෙ කංසාවලට සංස්කෘත බසින් කියන නමක්.කංසා ගැන අත්දැකීම ලබන්න ඒ ගැන දැනුවත් වෙන්න, නිවැරදි විස්තර හොයන්න නිරන්තරයෙන් මා පෙලූ කුතුහලය නිසාම මම මේ පොත කියෙව්ව.

කතුවරයා කැළණිය විශ්වවිද්‍යාලයෙන් සත්ත්ව විද්‍යාව පිළිබඳ තම මූලික උපාධිය හදාරා පසුව දර්ශනපති උපාධියත් ආචාර්ය උපාධියත් හිමිකරගත්තෙක්.2003 දී විද්‍යා පර්යේෂණ ලිපි සඳහා ජනාධිපති සම්මානය හිමිකර ගත්තෙක්.

මේ කෘතියත් ඔහු විසින් ලියූ පර්යේෂණාත්මක කෘතියක්.සත්‍ය සොයා ගැනීමේ ආසාවෙන් මඩිනා ලදුව විවිධ ක්ෂේත්‍ර පිළිබඳ පර්යේෂණ සිදුකරමින් වසර 17 ක් තිස්සේ ලැබූ අත්දැකීම් මේ ග්‍රන්ථ සම්පාදනයට ඇතුළත්.පොත අවසානයේ පිටු හත අටකින් සමන්විත මූලාශ්‍ර කියන කොටස බැලුව නම් මේ පොත ආවට ගියාට නොලියූ පොතක් බව දෙස් දෙනව.සිංහල හා ඉංග්‍රීසි බසින් ලියූ පොත්,පර්යේෂණ පත්‍රිකා,වාර්තා චිත්‍රපට වැනි මූලාශ්‍ර ඇසුරු කර තවත් කෙනෙකුට තේරෙන බසකින් ලියන එකත් වෙහෙසෙකර ව්‍යායාමයක් යැයි පොත අවසානයේදී ඒත්තු ගැන්වෙනව.

සමස්ත පුස්තකය ප්‍රධාන වශයෙන් කොටස් තුනකින් සමන්විතයි.ඊටත් ප්‍රථමයෙන් මේ කෘතියෙ " අවතීර්ණය" නම් කොටසේ කංසා අරභයා ඔහුගේ අතීතකාමී අත්දැකීම් එනම් ළමාවිය ,පාසල් විය , විශ්වවිද්‍යාලය අවධිය , ආචාර්ය උපාධි පර්යෙෂණ අවධිය හා සබැඳුණු ස්මරණයන් පිළිබඳ කෙටි පූර්විකාවක් ඇතුළත්.ඉන්පසුව මේ විෂය අලලා පොත ලිවීමට පදනම් වූ හේතුපාඨයක් , රූප සටහන්, හා සංක්ෂේපණියක් අන්තර්ගතයි.

එකී රූපසටහන්වල මුලින්ම ඇති විවිධ යුග ගැන සඳහන් "යුග චක්‍රය"නම් රූප සටහන විශේෂයෙන්ම අධ්‍යනය කළ යුත්තක්.ඉලිප්සියාකාර ධාවන පථයක ගමන් කරන අපගේ සෞරග්‍රහ මණ්ඩලය හා සූර්යයා අතර ඇති සම්බන්ධය නිසා මිනිසාගෙ ප්‍රඥාව යුග හතරක් පසුකරමින් ගමන් කරන ආකාරය මෙහි ඇතුළත්.වැඩිදුර අධ්‍යනය සඳහා පහත යූටියුබ් සබැඳිය බලන්න.

https://www.youtube.com/watch?v=DhyzKzx03VU

ඉතින් පොතේ පලමු කොටස " විශ්වය".

පළමු පරිච්ඡේදය " පෘථිවිය, ජීවය සහ එන්ඩොකැනබිනොයිඩ".

වසර බිලියන 13.7 කට ඉහතදී විශ්වය ආරම්භ වූ ආකාරය, ජීවය බිහිවී විකාශනය වූ අයුරු ඔහු පියවරෙන් පියවර විස්තර කරනව.
ඇරඹුම, සෞරග්‍රහ මණ්ඩලය, ක්ෂීරපථය, පෘථිවිය සහ හඳ, සාගර ජලය වැනි අනුමාතෘකා යටතේ කතුවරයා කර තිබෙන විස්තරය අතිශය නිරවුල්.ඉතාම පැහැදිලි ඕනම තරාතිරමක කෙනෙකුට තේරුම් ගත හැකි විදියට ඔහු මේ කොටස ලියා තියෙන ශෛලිය හරිම අපූරුයි.ඒ වගේම රසවත්.නිර්මාණාත්මකයි.

ඉහත මාතෘකාව යටතේ වසර බිලියන 3.9, වසර බිලියන 3.5 , වසර මිලියන 750 , 600 යනාදී වශයෙන් අවරෝහණය වෙමින් ඔහු කර ඇති මේ විස්තරය නිසා මම මේ කියවන්නෙ " කංසා" පිලිබඳ ලියැවුණු පොතක්ද පවා කියන කාරණය මට මොහොතකට අමතක වෙනව.එහි තියෙන අපූර්වත්වය නිසාම " කංසා" නම් ප්‍රධාන මාතෘකාව යටපත් කර පාඨකයාව වෙනත් ඉසව්වකට ඇදගෙන යන්න තරම් පළමු කොටස අපූර්වත්වයකින් යුක්තයි.

කංසා ගැන කතාකරන්න යනවානම් ලෝකේ පටං ගත්ත තැනටම යන්න ඕනද? කෙනෙක්ට සාධාරණ ප්‍රශ්නයක් එන්න පුළුවන්.නමුත් අර කලින් කිවූ හේතුපාඨය නම් කොටසෙ, අවසන් භාගයේ, ඔහු එය සාධාරණීකරණය කරන්නෙ " සියල්ල සාපේක්ෂව තිබිය යුතු යැයි සිතුණු බැවින් කංසා පිළිබඳ ලියන මෙම ග්‍රන්ථය ආරම්භ කරන්නේ විශ්වයේ ආරම්භය සනිටුහන් කරමින් බව " කියමින්.තෙවන පරිච්ඡේදයේ ඇති " මිනිසාගේ ව්‍යාප්තිය" ත් අර කලින් කොටස වගේම අපූරු විස්තරයක්.

රුහුණේ මීකිරි කිව්ව වගේ ලංකාවේ තණමල්විල කිව්වම බොහෝ අයට මතක් වෙන්නෙ කංසා.මල් කියලත් කියනව.ඒ පළාත්වල හොරෙන් වවන කංසා හේන්, පොලිසියෙන් අල්ලපු කංසා,ඒ සම්බන්ධ නඩු අද දිනපතා පුවත්පත්වල ඇති සුලභ පුවත්.ප්‍රසිද්ධියේ , හොර රහසේ කතාවෙන මේ ශාකයේ උත්පත්තිය අදින් වසර මිලියන 35 කට ඉහතදී මධ්‍යම ආසියාවේ හිමාල කඳුවැටියෙන් උතුරට වන්නට තිබූ අල්තායි කඳුවැටියෙන් ගලා බසින ගංගා මිටියාවතක බිහිවූ බවයි මේ පොතේ සඳහන් වන්නෙ.එය එතරම් ඈතට දිවයන ඉතිහාසයක්.ක්‍රමයෙන් නැඟෙනහිර ආසියාවෙ ගංගා නිම්න කරා සංක්‍රමණය වන මිනිසා කංසා ශාකයෙන් ප්‍රයෝජන ගන්නා ආකාරය තියෙන්නේ පොතේ දෙවන කොටසේ ආරම්භයත් සමඟ.එය පරිච්ඡේද 18 කින් සමන්විත සවිස්තරාත්මක කොටසක්.

කතුවරයා එහිදී පුරාවිද්‍යාත්මක , ඓතිහාසික, ආයුර්වේද, බටහිර විද්‍යාත්මක පර්යේෂණ යන පුළුල් මානයන් ඔස්සේ මේ ගැන විස්තර ඉදිරිපත් කරනව.එමඟින් හෙළිදරව් වන මිනිසා සහ කංසා අතර ගසට පොත්ත මෙන් තිබූ සහසම්බන්ධතාව ඔහු දීර්ඝ වශයෙන් කරුණු පැහැදිලි කරනව.ක්‍රි.පූ 10,000 න් පටන්ගෙන වර්තමානය තෙක් විස්තර එහි ඇතුළත්.නමුත් බොහොම සරලව.

පොත කියවන විට දැනෙන තව දෙයක් තමයි විශේෂ සිදුවීම් ඇතුළත් දිනපොතක් පරිශීලනය කරනව වගේ හැඟීමක් එන එක.විශේෂ අනුමාතෘකා යටතේ ඒ ඒ කාලපරිච්ඡේදයන්වල සිදුවූ විවිධ සිදුවීම් මේ සඳහා ඇතුළත්.බොහෝ සිදුවීම් කංසා හා බැඳුණු ඒවා.තවත් සිදුවීම් කංසා හා සම්බන්ධයක් නැතිවූත් ඒ ඒ කාලයන්හි සිදුවූ වැදගත්කමක් ඇතැයි සැලකිය සිදුවීම්.

උදා.

ක්‍රි.ව. 700

ප්‍රංශයේ වැල් පාලම්
------------------
මේ අතර ප්‍රංශයේ සිටි ඉංජිනේරුවන් දැවැන්ත කඹ භාවිතා කර වැල් පාලම් ගොඩ නැගූහ.ඒ සඳහා ශක්තිමත් බවෙන් සහ කල්පවත්නා ගුණයෙන් යුත් කංසා තන්තුවලින් ඇඹරූ කඹ භාවිතා කෙරිණි.

118 පිටුව

ක්‍රි.ව. 1882

නිව්යෝර්ක් නුවරට විදුලිය
------------------------
තෝමස් අල්වා එඩිසන්ගේ විදුලි බුබුල සහ විදුලි බලාගාර තව දුරටත් වර්ධනය විය.වසර 1882 දී ඇමරිකාවේ නිව්යෝර්ක් නගරය විදුලි බුබුළුවලින් ඒකාලෝක විය.

207 පිටුව

ක්‍රි.ව.1898

පිටගැස්මට කංසා හොඳයි
------------------------
වසර 1897 දී ඊ.ජේ.වොරින්ග් නැමති වෛද්‍යවරයා සිදුකළ පර්යේෂණවලින් හෙළි වූයේ කංසා දුම් බීමෙන් පිටගැස්ම සුව කර ගත හැකි බවය.

216 පිටුව

සාමාන්‍යයෙන් පර්යේෂණ කෘතියක් කියවනවිට දැනෙන වෙහෙසකර බව , නීරස බව එපා වෙන සුළු ස්වභාවය මේ කෘතියේ නොදැනෙන්නේ කතුවරයා විසින් භාවිතා කර ඇති ඉහත ව්‍යුහය වීමට පුළුවන්.කරුණු පාඨකයාට ඉදිරිපත් වෙන්නේ ඉතිහාසයේ පටන් වත්මන දක්වා සරලව පිළිවෙළක් ඇතුව.නැත්නම් A4 ප්‍රමාණයේ පිටු 350 ක් ඇති මේ පර්යේෂණාතමක කෘතිය කියවා අහවර වෙනවිට හෙම්බත් වෙන්න තියෙන ඉඩකඩ ඉතා වැඩියි.

හරිහමන් පැහැදිලි කිරීමක් සොයාගත නොහැකිව මම කවදත් පැටලී සිටි හෂීස් සහ මරිජුවානා යන මත්ද්‍රව්‍ය වල වෙනස මම දැනගත්තෙ මේ පොතෙන්.

හෂීස් කියන්නේ කංසා ශාකයේම මැලියම ආශ්‍රයෙන් නිපද වන්නක්.මරිජුවානා කියන්නෙ මේරූ කංසා කරටි වියළා කුඩු කර දුම්කොළ හා මිශ්‍ර කර බොන බීමක්.මෙක්සිකෝවේ පාරම්පරික ගොවීන් මෙහි නිර්මාතෲවරුන්.මරිහුවානා (Marihuana)ලෙස මෙක්සිකෝව පුරා ව්‍යප්ත වුණු මෙය ඇමෙරිකාවේදී නම්වර ලබන්නෙ මරිජුවානා (Marijuana)ලෙස.

මේ දෙකම කංසා හා සෘජුවම බැඳුණු දෑ.ඒ සඳහා නිරවුල් පැහැදිලි කිරීම් සහිත වෙනම පරිච්ඡේදයන් දෙකක් පොතේ ඇතුළත්.

ඉතින් පසුකාලීනව මිනිසාගේ ව්‍යප්තියත් එක්කම කංසා ශාකයත් ලෝකේ හැමතැනටම ව්‍යප්ත වෙනව.එය කොයිතරම් විවිධ රටවල් , ඒ ඒ රටවල සංස්කෘතීන්, ඒවායේ ජනජීවිත සමඟ බැඳුණද කියන කාරණයට හොඳම උදාහරණය වන්නේ කංසා ශාකය ඒ ඒ රටවල හැඳින්වීමට යොදාගන්නා ලබන නාමයන්.

අරාබි වෙදැදුරන් " කනාබ්" ලෙසත්, යුදෙව්වන් " කනෙහ්බොසම්" ලෙසත්, ආධ්‍යාත්මය ගවේෂණය කළ ඉන්දියානුවන් " ගන්ජා,මෝහිනී,බන්ගා,විජයා,වීරපත්‍ර,ගංජාකිනි" ලෙසත් නවීන නම් ලෙස "රීෆර්,වීඩ්,සින්සිමිල්ලා,ජොයින්ට්,කේජී" ලෙසත් නම් ලැබීමෙන්ම මේ ශාකය පුළුල් වපසරියක ව්‍යප්ත වූ ශාකයක් බව තේරුම් ගන්න වෙනත් අටුවා ටීකා අනවශ්‍යයි.

වත්මනේ ඇමෙරිකාවෙ ඇතැම් ප්‍රාන්තවල නීතිගත කලත් අතීතයේ ඇමෙරිකාව විසින් පැතිර වූ අසත්‍ය හා භයානක තොරතුරු පදනම් කරගෙන එක්සත් ජාතීන්ගේ සංවිධානය විසින් කංසා තහනම් කර ඇතත් මෙකී ශාකය හරහා ලබාගත හැකි ප්‍රයෝජන බොහොමයක්.අප විසින් කප්රුක යැයි සලකන පොල් ගසේ මෙන් මෙම ශාකයේත් සෑම කොටසක් පාහේම කුමක් හෝ ප්‍රයෝජනයට ගත හැකි මට්ටමේ පවතිනව.

කංසා ඇටවලින් ආහාර පිසින තෙල්, සබන්, මුද්‍රණ තීන්ත,ඉන්ධනද කංසා පියළි ධාන්‍ය හෝ පිටි ලෙස බේකරි ආහාර, අයිස්ක්‍රීම්, කේක් සෑදීමටද , ගසේ පොත්ත නූල්, ලණු, කඹ රෙදි, කැන්වස් සඳහාද අරටුව කැන්වස්, බුමුතුරුණු ,දැල් සඳහාද මුල් ඖෂධ සඳහාද භාවිතා වෙනව.නමුත් අපේ බහුතරයකගේ හණමිටි අදහස වන්නේ කංසා යනු ආතල් එකට මත්වන්නට ගන්නා ලබන භයානක මත්ද්‍රව්‍යක් කියන කාරණය.

කැනබිනොයිඩ පර්යේෂණ නම් පරිච්ඡේදයේ කංසා ශාකයට ආවේණික රසායන සහ මිනිස් සිරුර අතර ඇති සම්බන්ධතාව පිලිබඳ තොරතුරු ගැන විද්‍යාත්මක පැහැදිලි කිරීම් ගොන්නක් ඇතුළත්.කංසා පර්යේෂණ ,පිළිකා නිවාරණයට කංසා,කැනබිනොයිඩ හා රසායන අගුලු, මොළයේ හැසිරීම වගේ අනුමාතෘකා යටතේ.විද්‍යාත්මක හැදෑරීමක් කරන අයෙකුට මේ කොටසේ කරුණු ඉතා වැදගත් ඒව ලෙස සලකන්න පුළුවන්.විශේෂයෙන් සිංහලෙන් මේ වගේ පැහැදිලි කිරීම් සුලභ නොවන නිසා.

තවත් කාරණයක් කියන්නම ඕන.
පොතේ කතුවරයා සඳහන් කරන විදියට 1958 අගෝස්තු 10 වනදා සිළුමිණ පත්‍රයෙ කංසා පිලිබද ලිපියක් පලවෙනව.ලිපිය ලියන්නෙ රාජකීය පණ්ඩිත කිරිඇල්ලේ ඥාණවිමල හිමියන්.බොහොම වැදගත් කරුණු ටිකක් තියෙන්නෙ.

" කංසා පැළය ගැන දැන ගැනීම හා එයින් ප්‍රයෝජන ගැනීම පෙරදිග ශිෂ්ටාචාරයේ ආරම්භයත් සමග ඇති වූවකි.ඉතිහාසයට පෙර විසූ මනුෂ්‍යයෝ ජලය, ගින්න, සුළඟ මෙන්ම කංසා පැළය ද දේවත්වයෙහි ලා සැලකූහ.මෙසේ සලකන ලද්දේ ජලය, ගින්න, සුළඟ මෙන්ම කංසා පැළයෙන්ද මානව සමාජයට සිදුවන යහපත සළකාගෙනය.එකී වස්තූන් මෙන්ම කංසා පැළයද වැරදි ලෙස පාවිච්චි කරන්නට ගියහොත් සිදුවන්නේ හානියක්මය.එහෙත් ජලය,ගින්න, හා වාතය අන්තරාදායක යැයි සිතා ප්‍රතික්ෂේප කළ කිසිවෙකු මේ මිහිපිට ජීවත් වූයේ නැත.මනුෂ්‍ය ජීවිතයක ස්වාභාවික ජීවන බලය රඳා සිටීමේ ලා විශාල කාර්යභාරයක් ඉටු කළ හැකි කංසා පැළයද වැරදි ලෙස පාවිච්චි කිරීමෙන් අනතුරු සිදුවිය හැකිය.එසේ වන හෙයින් කංසා භාවිතය සම්පූර්ණයෙන්ම ප්‍රතික්ෂේප කළ සිහි බුද්ධිය ඇති කිසිවෙකුද මේ තාක් අප අතර නැත.කංසා වැවීම, වෙළඳාම , හා පාවිච්චිය මේ රටේ සම්පූර්ණයෙන්ම තහනම්ය.එහෙත් මේ රටේ කංසා වැවීම, වෙලදාම , හා පාවිච්චිය යම් ප්‍රමාණයකින් හෝ අඩුවක් වෙනසක් සිදුවී නැත.

දීර්ඝායුෂ බලාපොරොත්තු වන ජීවිතයේ මැදිවියෙහි සිටින අය කංසා මිශ්‍ර බෙහෙත් පාවිච්චි කරති.පණුගාය, උණ,කැස්ස, සෙම්ප්‍රතිශ්‍යාව හා බඩේ ගාය ආදි හදිසි සුලු අසනීපවලදී බාල මහලු කවුරුත් කංසා මිශ්‍ර ගුලි-කල්ක ආදියෙන් ප්‍රයෝජන ගනිති.ශරීර සැපය බලාපොරොත්තු වන හින්දු හා ඉස්ලාම් ලබ්ධිකයෝද කංසා මිශ්‍ර ආහාර වර්ග සහ පාන වර්ග සාදාගෙන කති බොති.විනෝදය බලාපොරොත්තු වන අය කංසා මිශ්‍ර දුම්වැටි සාදාගෙන උරති.

පරීක්ෂාකාරී ලෙස සොයා බැලුවොත් කංසා නීතිය ක්‍රියාවේ යොදවන අයත් එයින් දඬුවම් ලබන අයත් එකසේ ම කංසාවලින් ප්‍රයෝජන ගනිති.කංසා මිශ්‍රණයක් පාවිච්චි නොකළ , එයින් ප්‍රයෝජන නොගත් කිසිවකු මේ දිවයිනෙන් සොයා ගැනීම දුෂ්කර කාරියකි.එහෙත් මේ රටේ කංසා සම්පූර්ණයෙන්ම තහනම් ද්‍රව්‍යයකි."

පණ්ඩිත හිමියන් මෙම ලිපිය අදින් වසර 59 කට පෙර ලියූවත් අදටත් අප රටට වලංගු වන්නේ මෙහි ඇති කරුණු කාරණාම නොවේද.?

අවසානයේ කතුවරයා පවසන පරිදි කංසා පිළිබඳ බටහිර ජාතීන් අවබෝධය ලබන්නේ විද්‍යාත්මක පර්යේෂණ හරහා ඔප්පු කර ගැනීමෙනි.අවිද්‍යාව නිසා කලකට පෙර ඔවුන්ම මත්ද්‍රව්‍යයක් ලෙස තහනම් කළත් අද වන විට ඔවුන් තම වැරැද්ද නිවැරදි කරගැනීමට තරම් නිහතමානී වී ඇත.ඒ, ලෝකයේ රටවල් 30ක් පමණ කංසා වගාකර හරිත ආර්ථික විප්ලවයට අවතීර්ණ වීමෙන් වාසි ප්‍රයෝජන ලබා ගැනීමෙනි.

කතාව සහතික ඇත්තය.ආචාර්ය වසන්ත වැලිඅංගයන් කියන යුග චක්‍රයේ පරිදිම අප තවමත් සිටින්නේ කලියුගයේ බහින කලාවට ඔබින මානසික තත්වයේය.කංසා නැතත් අපේ දිවයිනේ වෙනත් බොහෝ කරුණු සම්බන්ධයෙන් පවා අපට ඇත්තේ අවිද්‍යාව පෙරදැරි කරගත් ආකල්පයන්ය.එනයින් බලනකල කංසා සම්බන්ධයෙන් මෙසේ සත්‍ය අසත්‍ය හරිහැටි අවබෝධ කරනොගෙන වැරදි මතිමතාන්තර ඇතිවීම ගැන පුදුම විය යුතුද නැත.

තවත් බොහෝ විස්තර කරුණු කාරණා දැනගෙන සත්‍ය ගවේෂණය කර ප්‍රඥාව පහළ කරගැනීමට " ත්‍රෛලෝක්‍යවිජයා" සිහි බුද්ධියෙන් කියවා අවබෝධයක් ලබාගන්න.

පොතේ ඇති හැමදේම කියන්න යාමෙන් එහි ඇති රසය අඩුවිය හැකියැයි මට දැන් සිතේ.එය මෙය කියවන්න බලාපොරොත්තුවෙන් සිටින පාඨකයාටද කරන අසාධාරණයකි.කවදත් සිදුවනවා සේ කංසා ගැන කුහුලක් ඔබට ඉතිරි කළ යුතුය.කුතුහලයක්ද නොතිබ්බොත් වැඩක් නැත.සර්ප්‍රයිස් වෙන්නේ එතකොටය.තහනමට අදාළ වැඩි විස්තර සඳහා "ත්‍රෛලෝක්‍යවිජයා" කියවන්න.

නිර්මාලයා
Nirmal Ranasinghe Bmd

16.08.2017

- අපෙන් සමුගත් විශිෂ්ට සංගීත අධ්‍යක්ෂවරයෙක් -

විවාහ වූ අළුත මෙරීනා සමරු පොතක් (ඔටෝග්‍රාෆයක්) සිය සැමියා අත තබා පැවසූයේ ඔහුට හමුවන කළාකරුවන්ගේ අත්සන් එහි ලබා  දෙන්නැයි කියමිනි.ඔහු කලාකරුවන් හා නිතර ඇසුරු කිරීම ඊට හේතුවය.එහි දෙවන පිටුවේ ඇගේ සැමියා විසින් තැබූ අපූරු සටහනකි.

" Musician is born to live,entertain & die."

ඇගේ සැමියා අන් කවරෙකුත් නොව මෙරට සංගීත ක්ෂෙත්‍රයේ තමන්ගේම අනන්‍යතාවක් සනිටුහන් කළ පැට්‍රික් දෙනිපිටියයන්ය.

1934 අගෝස්තු මස 11 වනදා කොළඹ කොටහේනෙ කරොනේලිස් දෙනිපිටියගේ බිරිඳ වූ මේරි සිමෝනාට දාව උපත ලැබූ පැට්‍රික් දෙනිපිටිය අධ්‍යාපනය හැදැරුවේ කොටහේනේ සාන්ත බෙනඩික්ට් විද්‍යාලයෙනි.පසුකලෙක ඔහු සුනිල් සාන්තයන්ගෙන් පවා සංගීතය හදාළ අයෙකි.ඒ බැව් මහාචාර්ය සුනිල් ආරියරත්නයන් විසින් ලියූ "සුනිල් සාන්ත අධ්‍යනය" නම් කෘතියේ සඳහන් වෙයි.

"කොළඹ විශ්වවිද්‍යාලය,කොළඹ සාන්ත ජෝසප් විද්‍යාලය,බොරැල්ලේ තරුණ බෞද්ධ සමිති ශාලාව,මරදානේ නිව්ටන් ගොඩනැඟිල්ලේ පිහිටි ෆෝවර්ඩ් ඇකඩමිය සුනිලුන්ගේ ගායන හා වාදන පංති පැවැත්වූ ස්ථාන කීපයකි.එම පන්තිවල අයිවෝ ඩ්ව්නිස්,කාන්ති වක්වැල්ල,පැට්‍රික් දෙනිපිටිය,ක්‍රිස්ටෝපර් පෝල්,රෝහිත ජයසිංහ, චිත්‍රා සෝමපාල ආදීහුද වූහ."

වාද්‍ය භාණ්ඩ බොහෝමයක් වාදනය කිරීමේ ලා ඔහුට පැවතියේ විශේෂ හැකියාවකි.මෙරට සංගීතයට ඉලෙක්ට්‍රික් හවායින් ගිටාරය හඳුන්වාදීමේ පුරෝගාමියා ඔහුය.වේගවත්ම ස්වර ප්‍රස්ථාර රචකයෙකු ලෙස එකළ ඔහු ප්‍රසිද්ධියක් ඉසිලූ අතර එකී කර්තව්‍යය කිසිඳු සංගීත භාණ්ඩයක් උපයෝගී කරනොගෙන සිදු කිරීමද ඔහු සතු වූ විශේෂ හැකියාවකි.ලේක්හවුස්  ආයතනයේ රාජකාරි කරන අතරතුර සංගීත අධ්‍යක්ෂණ කටයුතුවලද නියැලුණු හෙතෙම  අද මෙන් තාක්ෂණය, අන්තර්ජාල පහසුකම් නොතිබූ ඒ යුගයේ බටහිර සංගීතයේ ආභාෂය මෙරට සංගීත නිර්මාණවල තවරා ඇති ආකාරය විස්මය සහගතය.

ඔහුගේ නිර්මාණයක් වන "මා හා එදා ප්‍රිය සාදයේ" යන ගීතයේ තාලය (Beat) එක බටහිර ආලිංගන (Ballroom ) නැටුම්වලදී යොදාගැනෙන Jive නම් තාලයට සමානය.Jive තාලය 1930 දී පමණ ඇෆ්‍රිකන් ඇමෙරිකානු හඳුන්වා දීමකි. Fast Jive හා Slow Jive වශයෙන් මූලික කොටස් දෙකකි.එල්විස් ප්‍රෙස්ලි ගයන Julie නම් ගීතයේ තාලයද මෙවැනිමය.

ගීතයෙන් කියවෙන්නේ ප්‍රිය සාදයක නැටුමකදී හමුවූ තරුණියක් ගැනය.නැටුමකට ගැලපෙනම තාලයක් දෙනිපිටියයන් විසින් මෙහිදී යොදාගැනීමෙන්ම එකළ 70, 80 දශකයන්වල්දී මෙරට සංගීතය තිබුණේ කොතැනදීද යන්න සනාත කෙරේ.තවද මෙයට ආරම්භක සංගීත කණ්ඩයේදීම සැක්සෆෝනය භාවිතා කිරීමෙන් ගීතයට ජෑස් සංගීතයේ (Jazz Colour )වර්ණය ආලේප කර ඇත.සැක්සසෝනය ජෑස් සංගීතයේ බහුලව භාවිතාවන සංගීත භාණ්ඩයකි.(Brass Instrument ) එය විරහව,ශෝකය,ආලිංගනය,රෝමාන්තික බව,ලිංඟිකත්වය වැනි ඕනෑම හැඟීමක් උද්දීපනය වන අයුරින් යොදාගත හැකි සංගීත භාණ්ඩයකි.

මිල්ටන්ගේම තවත් ගීයක් වන " ඉවුරු තලා" හි තිස්ස කුමාරපතිරණ විසින් වාදනය කළ බේස් ගිටාර් වාදනය අදටත් කලාතුරකින්වත් දක්නට නොලැබෙන වාදනයකි.Funk Groove ආරේ බේස් ගිටාර් වාදනයක් එකළ එම නිර්මාණයට පැට්‍රික් දෙනිපිටියන් විසින් යොදාගැනීම ඔහුගේ යාවත්කාලීන නිර්මාණශීලිත්වයට කදිම නිදසුනකි.

Samba ශෛලියට බර ගීතයක් වන සී.ටී.ප්‍රනාන්දු ගයන"රන්වන් රන් කෙඳි පිරාලා"  ගීයද තව උදාහරණයකි.තව එවන් නිර්මාණ බොහෝමෙකි.

මිල්ටන්ගේ මා නිසා ඔබ,රන්මසු නෑ කියා,සයුරු තෙරේදී, සී.ටී ප්‍රනාන්දුගේ සිහින ලොවේ මිහිර මැවූ මාලි,ඈත කඳු රැලි සිඹ සිඹ,එම්.එස් ප්‍රනාන්දුගේ මලක් කඩා කොණ්ඩෙ ගසාලා,නෙළුම් මලේ පෙති කඩලා,සී.ඩී.ෆොන්සේකාගේ උඩරට මැණිකේ මනහර කඳුරට තිලකේ වැනි නිර්මාණ ඔහු කළ නිර්මාණවලින් අතළොස්සක් පමණි.තව ලිවිය හැකි නිර්මාණ විශාල ප්‍රමාණයකි.

ගහේ කටු මොනවට උල්කල යුතුදැයි අසන්නා සේ වත්මනේ  ඔහුගේ එක් පුත්‍රරත්නයක් වන මහේෂ් දෙනිපිටියයන් මෙරට සංගීත කලාවට නවමං සොයමින් ඔහු ගිය මගම ගමන් කරයි.

මෙරට සංගීත කලාවට තම නිර්මාණශීලිත්වයේ උපරිමය මුදාහල පැට්‍රික් දෙනිපිටිය නම් වූ විශිෂ්ට  සංගීත අදියුරා කැනඩාවේදී මෙලොවින් සමුගෙන අදට සිවු වසරකි.

නිර්මාලයා
Nirmal Ranasinghe Bmd
23.03.2017

- සී.ටී.ප්‍රනාන්දු හා මේරියන්ස් සමඟ ගතකළ රැයක් - .. - Review of The CT Fernando Show by Marians -

සී.ටී.ප්‍රනාන්දු මේරියන්ස් අන්ප්ලග් ප්‍රසංගය පසුගිය මාසෙක නැරඹීමට මට අවස්ථාවක් උදා උනා.මේ ප්‍රසංගය පැවැත්වුවේ තුන්වෙනි වතාවට.මහරගම තරුණ සේවා සභාවේ පැවති මේ ප්‍රසංගය සංවිධානය කර තිබුණේ පන්නිපිටිය ධර්මපාල විද්‍යාලීය ආදි සිසුන් විසින්.ප්‍රසංගය බොහොම ආකර්ෂණීය, කර්ණරසායනය ඉහළ නංවපු ප්‍රසංගයක්.ප්‍රසංගය අවසන් වෙලා මාසෙකටත් වැඩි වුවත් ඒ ගැන යමක් ලිවිය යුතුමයි කියල හිතුනෙ ඒ ගීතවල තිබ්බ ආකර්ෂණීය බව නිසා.මේරියන්ස් කණ්ඩායම යෙදූ අපූරු නව සංගීත සංයෝජනය නිසා. ඔය හින්දම මං මේක ටැබ් එකේ ඕඩියෝ විදියට පටිගත කරගත්ත.

සී.ටී.ප්‍රනාන්දු එහෙම නැත්නම් සිරිල් ටියුඩර් ප්‍රනාන්දු ගැන ආචාර්ය තිස්ස අබේසේකරයන්ගෙ 'අයාලේ ගිය සිතක සටහන්' කෘතියේ සඳහන් වන්නෙ මෙන්න මේ විදියට.

" සී.ටී.ප්‍රනාන්දුට තිබුණේ දුර්ලභ ගණයේ කටහඬකි.එහෙත් සිංහල සංගීතය වටකොට ගොඩනැඟී තිබුණු විචාර ස්ථාවරය,සී.ටී.ප්‍රනාන්දුව බැහැර කළේය.1972 - 73 වසර වනවිට සිංහල සංගීතයට බටහිර සංගීතයේ බලපෑම තදින් ඇතිවන්නට වී තිබුණි.සංගීතයට නිදහසේ වැඩෙන්නට ඉඩ දිය යුතුය යන්න තරයේ ඇදහූ එවකට ගුවන්විදුලියේ සභාපති නෙවිල් ජයවීරයන් සිංහල සංගීතය වටා තිබූ බොහෝ තහංචි ඉවත් කළේය.හේ සීටී ගේ කටහඬට බෙහෙවින් ඇලුම් කළේය.බොහෝ කළකට පසු සී.ටී.ප්‍රනාන්දු ගායකයෙකු ලෙසෙ ව්‍යප්ත වන්නට වූයේ මේ කාලයේය."වනබඹරු" ගීතය ඈත ගම්දනව්වල පමණක් නොව,කොළඹ සුපිරි හෝටල්වලින් පවා එකසේ ඇසෙන්නට විය.ඒ ගීය අසා සී.ටී ගේ කටහඬට ඇලුම් කළ මැඩම් ඩෙල් ගාඩෝ, නම්වූ යුරෝපීය ඔපෙරා ගායිකාවක් ඔහුට ලන්ඩනයට ආරාධනා කොට ප්‍රසංගයක් පැවැත්වීය.ලන්ඩනයේ හෝ වෙනත් බටහිර නුවරක පවත්වනු ලැබූ මුල්ම ප්‍රසිද්ධ සිංහල ගී ප්‍රසංගය මෙයයි. "- පි 137

සී.ටී.ප්‍රනාන්දුගේ ගීතවලට තිබූ ජනප්‍රියත්වය තේරුම් ගැනීමට මෙයම බොහෝ ප්‍රමාණවත්.
ඔහු අපේ රටේ හිටපු පොප් තරුවක්.

මේ ප්‍රසංගයේ මුලින්ම ගායනා කිරීමට තෝරාගෙන තිබුණේ සී.ටී.ප්‍රනාන්දු මහතාගේ "අවදිවන්න අවදින්න " කියන ගීතය.එහි ප්‍රාරම්භක සංගීත ඛණ්ඩයට යොදාගෙන තිබුණේ Tenor සැක්සසෝනය.ෂෙහාන්ගෙ වාදනය ජෑස් ශෛලියට නැඹුරු වාදනයක්.ඊට සුභාෂ්ගෙ ඩ්‍රම්ස් වාදනයෙන් එකතු වුණේ අපූරු රිද්මයක්.ගීතයේ අන්තර් වාදනයේදි (Interlude ) සැක්සෆෝනය හා පියානෝ වාදනයෙන් ඉහත කී ජෑස් වර්ණ රටාවලට සමෝසමේ පෑහෙන රිද්මයක් එකතු වූ අතර නවතාවකින් යුතුව මුසු කළ සංගීතය, මුල් ගීතයේ තිබූ රසය විකෘති නොකර එකී මූලික හැඩතල ඉස්මතු වන ආකාරයටම යොදාගැනීම ඉතා නිර්මාණශීලිය.

දෙවෙනි ගීතයට තෝරාගෙන තිබුණේ "බිළිඳා නැළවේ උකුළේ" යන ගීතය.ආරම්භයේ වාදනය වූයේ ජයන්තගේ අපූරු තබ්ලා හා ඩොල්කි වාදනය.පසුව ඊට එක්වුණේ ප්‍රසන්න රෝසාගෙ ගිටාර් වාදනය.එකී වාදනය සඳහා ඔහු භාවිතා කළේ Lap Steel ගිටාරයක්.මෙහි තත්වලින් නැඟෙන්නේ බොහොම තියුණු,ගැඹුරු,බොහෝ වෙලාවක් (Sustainable ) ඇදී යන හඬක්.වාදකයාගේ උකුල මත තබාගෙන තත් පුවරුවේ (Frets) ඇඟිලි වෙනුවට කුඩා ලෝහ බටයක් එහා මෙහා ගෙනයමින් අනෙක් අතින් තත් පිරිමදිමින් මෙය වාදනය කරන්නෙ."බිළිඳා නැලවේ" වැනි ගීයක් සඳහා බොහොම හැඟුම්බර (Emotional) හඬක් මේ ගිටාරයෙන් එකතු වුණේ ප්‍රසන්න රෝසාගේ වාදනයේ තිබුණ අපූර්වත්වය නිසා.ශිවන්ත ගායනා කළ"පින් සිදුවන්නේ" ගීතයටත් ඔහු මේ ගිටාරයම වාදනය කලේ තමාට පිය උරුමයෙන් ලද වාද්‍ය ශිල්පීය දායාදය සපථ කරමින්.
F Major ස්වර පරාසයේ වාදනය වුණු මේ ගීයේ අවසානයට ගැයූ ස්ථායි ( Chorus ) කොටසේදි G Major ස්වර පරාසයට (Key Change) විතැන් වුනේ ඒ අපූර්වත්වය තවත් ඉහළ නංවමින්.

"කළු මහවැලි කැළණිද වලවේ" ගීතයේ තාල වාදනයට යොදා ගෙන තිබුනේ Bossa nova තාලය(Beat).බොසනෝවා (Bossa nova) කියන්නෙ 1950 දශකයේ බ්‍රසීලයෙන් ලෝක සංගීතයට දායාද වෙච්ච ෂානරයක්.(Genre) මෙහි ලතින් නමේ තේරුම නව ප්‍රවණතාවක් (New trend) කියා අන්තර්ජාලයේ සඳහන් වෙනව.කෙසේ වුවත් මේ තාලය ගීතයට යොදා ගැනීමෙන් ගීතයට නව වර්ණයක් එක්වුණා කිව යුතුයි.

ඒ වගේම ප්‍රාරම්භක හා අන්තර් වාදනයෙදි (Interlude) යොදාගත්ත එකෝඩියනය,බටනළාව හා එකෝස්ටික් ගිටාරයේ සංයෝජනය ගීතයට එකතු කලේ නවතාවයක්.ඊටම ශිවන්තගේ හාමනි ගායනයත් හරියටම පෑහෙනව.මුල් ගීතය හා සසඳනවිට තාලය (Beat)වෙනස්ම තාලයක්.නමුත් ගීතය විකෘති නොකර තනුව ඒ අයුරින්ම යොදාගෙන සංයෝජනය කළ නව සංගීතය මේරියන්ස් Unplugged ප්‍රවණතාවට ගැලපෙන අයුරින්ම තිබීම අගය කළ යුතුම කරුණක්.සරත් විමලවීර මහතාගේ අති විශිෂ්ඨ ගේය පදත් එක්ක මේ සංගීතය කන වැකෙන විට නලින් පෙරේරා කිව්ව වගේම චිත්ත රූප මැවෙන එක හරි අපූරුවට සිදුවෙනව.

"අම්බිලි මාමේ " ගීතය ආරම්භයේදී ඇහෙන ෂෙහාන්ගේ Soprano Sax වාදනයත් හරි මිහිරි වාදනයක්.ඒ වාදනය ඇහෙද්දි ශෝකී බවක් එක්ක අතීතානුස්මරණයකට නොදැනුවත්වම හිත ඇදිල යන බවක් දැනෙනව.ජයන්ත හරි අපූරුවට තබ්ලා ඩොල්කි වාදනයක් ගීතය පුරාවටම ඉදිරිපත් කරනව.

"ලෝ අඩ නින්දේ" ගීතයේ ප්‍රවේශ (Intro) කොටසටත් එකෝඩියනය හා සැක්සෆෝනය යොදාගෙන රස වෑහෙන වාදනයක් වාදනය වෙනව.ඒ ගීතයේ කවුන්ටර් පාට්ස් හා අන්තර් වාදන විදියට දිලීප මංගල ඉදිරිපත් කරන එකෝඩියන් හා පියානෝ වාදනයෙන්  ගීතය බොහොම මිහිරි විදියට ඉදිරියට ගලා යනව.

" කිරල ගහේ ගෙඩි දිය මත වැටිල පහතට බැස යයි දිය රැල්ලේ ".බොහොම සුමියුරු පද රචනාවක්.

"අඹරුක් සෙවනැල්ලේ" ගීතයත් බටහිර ආරට සංගීතය මුසුවූ ගීතයක්.ගීතයට යොදාගෙන තිබුනේ ලතින් ඇමෙරිකානු Samba ශෛලියේ තාලයක්.ප්‍රවේශ සංගීතයත් (Intro) කොංගා ඩ්‍රම්ස් හා මුසුවූ වාදනයක්.සැක්සෆෝනයේ වාද්‍ය සහයත් මීට යොදාගෙන තියෙනව.ජයන්තගේ අපූරු බොංගෝ තාල වාදනයකුත් (Break) Cowbell වාදනයකුත් මීට ඇතුළත්.ගීතයේ ප්‍රවේශ සංගීතය ,අතුරු වාදන,අන්තර් වාදන කොටස් ඇහෙන කොට හිතෙන්නෙ ලතින් ඇමෙරිකානු රිද්මයක් ඇති ගීතයක් අහන් ඉන්නවා වගේ හැඟීමක්.

"පියුමෙහි පැණි බොති වන බඹරු" ගීතයත් මේ ආරටම ගිය ගීයක්.එහි අතුරු වාදනයේ (Interlude) දිලීප මංගලගේ කී බෝඩ් වාදනය හා ෂෙහාන්ගේ සැක්සෆෝන් වාදනයත් නියම සංයෝජනයක්.ඇත්තටම ඒ ගීතවල තියෙන්නෙ අපූරු රිද්මයක්.නැවුම් බවක්.අහන් ඉන්නකොට නැටවෙන අතපය ඉබේම හෙළවෙන අන්දමේ රිද්මයක්.

"සීගිරි සුකුමාලියේ" ගීතයත් රොක් ඇන්ඩ් රෝල් ශෛලියට අනුගත වුණ ගීතයක්.සැක්සෆෝන් වාදනයත් එක්ක ඒ ගීතය කෙතරම් බටහිර සංගීත ආභාෂයක් ලැබිලද කියල හිතන්න පුළුවන්.

ඒ වගේම "රෑ පැල් රැකලා", "පියුමෙහි පැණි බොති", "මී අඹ වනයේ", "මගේ සුදු මාමේ" "රන්වන් රන් කෙඳි" වැනි ගීතවල කීබෝඩ්ස් වාදන කොටස්වලට දිලීප මංගල යොදාගත් Hammond  Organ නාදයත් හරිම සුමියුරු නාදයක්.(Tone) ඒ ගීතවලට හරියටම ගැලපෙන නාද වර්ණයක් (Colour Tone) එහි ඇතුළත්. මේ හඬ (Tone) පැරණි ගීතවල බොහෝවිට ඇහෙන්න ලැබෙන හඬක්.

සී.ටී.ප්‍රනාන්දුගේ බොහෝ ගීත ඉතා පහසුවෙන් බටහිර ආරට ගයන්න වයන්න පුළුවන් ගීත.ඊට විශේෂම හේතුව 60 දශකයේ පවා මේ ගීත බටහිර සංගීත ස්පර්ශය සහිතව නිපදවා තිබීම.අද වගේ තාක්ෂණය,අන්තර්ජාල නොතිබූ ඒ යුගයේ ඒ වගේ සංගීතයක් මේ ගීතවලට යෙදීමත් විටෙක විස්මය දනවන්නක්.සංගීතය පැත්තෙන් ගත්තොත් ඒ කාලෙ හැටියට මේ ගීත ඉතාම යාවත්කාලීන වූ ගීත.

මීට මූලිකම හේතුව මේ ගීතවලට සංගීතය සැපයූ සංගීතවේදීන්ගේ තිබ්බ ශිල්පීය දක්ෂතාව.සී.ටී.ප්‍රනාන්දුගේ බොහෝ ගීතවල සංගීතය සපයල තියෙන්නෙ බඹරැන්දගේ බුද්ධදාස ශ්‍රීනාත් පෙරේරා නොහොත් බී.ඇස්.පෙරේරා කියන සංගීත අධ්‍යක්ෂවරයා.මහැඳුරු සුනිල් ආරියරත්නයන් ලියූ ගාන්ධර්ව අපදාන කෘතියට අනුව,

" සී.ටී.ප්‍රනාන්දු විසින් නිර්මාණය කරන ලද තනු බොහෝමයක සංගිත සංයෝජනය කළේද බී.ඇස්.ය. සී.ටී.ප්‍රනාන්දුගේ "අම්බිලි මාමේ" සහ "බරබාගේ" (තැටි අංක WN 82),"සුවඳ රෝස මල් නෙළා" සහ "පින්සිදුවන්නෙ අනේ බාල ළමුන්නේ" (තැටි අංක WN 70) යන ගී තැටිවල බී.ඇස්.ගේ නම සඳහන් වී ඇත්තේ Music arranged : B.S.Perera යනුවෙනි."

ආචාර්ය තිස්ස අබේසේකරයන් ලියූ 'අයාලේ ගිය සිතක සටහන්' නම් කෘතියේ ඔහු ගැන සඳහන් වන්නේ මෙලෙසය.

" බී.ඇස්.පෙරේරා විසින් නිර්මාණය කළ ගී රැසක්ම මගේ මතකයට නැගෙයි.'සිරිපාදේ සමනල කන්ද පෙනේ','දුර පෙනෙන තැනිතලා', 'වැදේ සුගන්ධේ','මාලා-රූපරා- කෝකිලා වී මා' ඉන් සමහරකි.දෙවන ලෝක සංග්‍රාම කාලයේදී හා ඉන් පසුව වසර ගණනාවක් යන තුරුත් ලොව පුරා මහත් සේ ජනප්‍රිය වූ ලතින් ඇමෙරිකානු සංගීතයේත්,ඇමෙරිකානු ගවපල්ලන්ගෙන් බිහිවූ ගොපලු ගීවලත් රිද්ම රටා තම ගීවලට උපයෝගි කරගත් බී.ඇස්.පෙරේරා  අපරදිග සංගීතයේ ලෝහමුවා සුෂිර භාණ්ඩ බහුලව යොදාගත් වාද්‍ය සංයෝජනයක් සඳහා අත්‍යවශ්‍ය වන්නාවූ අපරදිග සංගීත සම්ප්‍රදායේ මුඛ්‍ය ශිල්ප ක්‍රම වන සංඝාත (Chords ) සහ ප්‍රසංවාද (Harmony ) සිංහල සංගීතයේ ව්‍යක්ත ලෙසත් විධිමත් ලෙසත් මුලින්ම භාවිතා කළ සිංහල සංගීතකරුවා සේ සැලකිය හැකිය.ඒ හේතුව නිසාදෝ ඔහුගේ ගීත නාගරික මධ්‍යම පන්තිකයන් අතර බෙහෙවින් ජනප්‍රිය විය."

'ස්වකීය ගීවල පිළිඹිබු වූ බටහිර ශෛලිය නිසා බී.ඇස්. බැට කෑ අවස්ථා බොහෝය."

රේඛාව චිත්‍රපටයේ සංගීත සංයෝජනය හා අධ්‍යක්ෂණය පවා ඔහුට භාරවන්නේ එකී චිත්‍රපටයේ ගී තනු නිමැවූ සුනිල් සාන්තයන්ගේ රෙකමදාරුව මතය.කොටින්ම ඔහුගේ බටහිර සංගීත සම්ප්‍රදාය නොරිස්සූ එවකට හින්දුස්තාන් සංගීතය පමණක්ම අගය කළ පිරිසකගේ ක්‍රියාකලාපයන් නිසා ඔහු ගුවන්විදුලියේ වැඩතහනමකට පවා ලක්ව ඇත."පැලේ වසන රන්මලී","කාසි මැව්වෙ කවුද දෙයියනේ","සෝබන සැන්දෑවේ" ඇතුළුව එකල තවත් බොහෝ ජනප්‍රිය ගී නිර්මාණයන්ද බී.ඇස්.පෙරේරාගේය.

කොතරම් මිහිරි තනු සහිත සංගීත නිර්මාණ නිමැවූවත් වර්තමානයේ ඔහු එතරම් ප්‍රකට නැති සංගීතවේදියෙකි.නමුත් මේරියන්ස් නලින් පෙරේරා මේ ප්‍රසංගයේ බොහෝ තැන්වල මේ අසහාය සංගීතවේදියා පිළිබඳව සිය රසික ප්‍රජාව දැනුවත් කිරීමට කටයුතු කිරීම පැසසිය යුතු කර්තව්‍යයකි.

එමෙන්ම "රන්වන් රන් කෙඳි පිරාලා" ගීතය නිර්මාණය කර ඇත්තේ පැට්‍රික් දෙනිපිටියය.ඔහුද සී.ටී.ගේ ගීවලට බටහිරට මුසුවූ සංගීත සංයෝජනයන් සිදුකළ විශිෂ්ට සංගීතඥයෙකි.ඒ යුගය හා සසඳන කළ ඉහත කී නිර්මාණ අදටද වලංගු වන්නේ,නොනැසී පවතින්නේ ඒවායේ යොදාගත් ගේයපද ,මිහිරි තනු නිර්මාණ හා එකී යුගයට සාපේක්ෂව  වඩා යාවත්කාලීන වූ සංගීතය නම් කාරණා මත බව නිගමනයට එළඹිය හැක.තවද සෑම ගීතයක්ම ගායනයට පෙර එහි පදරචනය, තනුව හා සංගීතය කාගේදැයි කියා ප්‍රේක්ෂකයන් දැනුවත් කිරීමට නලින් පෙරේරා කටයුතු කිරීම ප්‍රසංශාත්මකය.මන්ද අද දවසේ එවන් සදාචාරාත්මක දේ ඇසීමට පවා උගහට වීමය.දැන් එවන් ආචාරධර්ම පිරිහුණු යුගයක අප ජීවත්වීමය.

ඉතින් ඉහත කී ගීතත් ප්‍රසංගයේ අනික් හැම ගීතත් මේරියන්ස් සංගීත කණ්ඩායම ඉතා හොඳින් නව සංගීතයෙන් වර්ණ ගන්වල තියෙනව.ගීත කීපයක් පමණක් තෝර ගත්තේ හැම ගීතයක් ගැනම විවරණය කිරීම ප්‍රයෝගික නොවන නිසා.ඒ වගේම මේ ප්‍රසංගය ඉදිරිපත් කිරීම බොහොම ආකර්ෂණීයයි.ප්‍රසංගය පුරාවට කුතුහලය රැකෙන පරිදි ඒකාකාරි නොවන විදියට ප්‍රේක්ෂකයන් ඇඳබැඳ තබා ගන්න නලින් පෙරේරා ප්‍රමුඛ මේරියන්ස් සමත් වෙනව.ඔවුන් සතු නිසඟ වාද්‍ය හැකියාවන්ගෙන් සී.ටී.ප්‍රනාන්දුගේ ගීත අලංකෘත කරනව.

ඒ වගේම මෙහි එන ඇතැම් ගීතවලට ඔවුන් සතුව අපූරු කතා ටිකක් ඇතුළත්. ප්‍රසන්න රෝසාගෙ මව ඔහු නැළවීමට ගැයූ ගීතය, ජෝ අංකල්ගෙ සින්දුව, ලංකාවේ වැඩිම ප්‍රස්තා පිරුළු සහිත ගීතය, පාර්ලිමේන්තුවේ නිතර ඇසිය යුතු ගීතය, සිංහල අච්චු පොතේ ඇති සින්දුව,සත්තුවත්තෙ සින්දුව, නලීන් පෙරේරා වේදිකාවක පළමුවරට කියූ ගීතය වගේ අපූරු කුහුළින් පිරුණු කතා ටිකක් මේ ගීතවලට බද්ධ වෙලා තියෙනව.ඒ වගේම "ආනේ ඩිංගක්" ගීතයේ තුන්වන අන්තරා (Verse) කොටස ප්‍රථමවතාවට මම ඇහුවෙ මේ ප්‍රසංගයේ.පදරචනය කළ ඩී.සී.ජයසිංහ මහතා ඒ තුන්වන අන්තරා කොටස පළමුවරට ගායනා කරන්නැයි නලින් පෙරේරා කළ ඇරයුම නිසා ප්‍රථම වතාවට මෙරට ශ්‍රාවකයින්‍ට ඒ දුලභ අවස්ථාව එදින උදාවීමත් ප්‍රසංගයේ තිබූ විශේෂ අවස්ථාවක්.

ප්‍රසංගය අවසාන වෙනවිට මට දැනුනෙ ජෑස් (Jazz) ලතින්(Latin),සම්බා(Samba),වෝල්ට්ස්(Waltz),රොක් ඇන්ඩ් රෝල්(Rock & Roll) වගේ සංගීත ශෛලීන් හැම එකකම අතරමං උනා වගේ හැඟීමක්.ඒ වගේම මේ තරම් බටහිරට බර සංගීත රටාවන් යොදාගත් ගීත ගොන්නට ක්ලැසිකල් ගිටාර් වාදනයේ සූර බේස් ගිටාර් වාදන ශිල්පී චමින්ද සිල්වාගේ, ක්ලැසිකල් ගිටාර් වාදනයන් ඇතැම් ගීතවලට එක්කරන්න අවකාශයක් ඇතැයි කියන එක මගේ පුද්ගලික හැඟීමක්.ස්පැනිෂ් සංගීත වර්ණයක් ඇතැම් ගීතවලට එකතු කරන්න එයින් පුළුවන්.එහෙම උනානම් සමහර ඒවා තව ටිකක් රහ වෙයි වගේ අදහසක් මම කියන්නෙ.නමුත් ඒක මගේ පුද්ගලික අදහසක් විතරයි.තීරණය මේරියන්ස් සතුයි.

සමස්තයක් විදියට ගත්තම කිසි අඩුපාඩුවක් නොවන විදියට ගීතවල රසය විකෘති නොකර අළුතින් යමක් නවීන ශබ්ද තාක්ෂණයෙන් යුතුව ප්‍රේක්ෂකයාගේ ඇසට,සවනට ලබාදීමට මේරියන්ස් සංගීත කණ්ඩායම සමත්වීම ඇගයිය යුතුමයි.ඒ සඳහා ගීත ගායනය සඳහා මේරියන්ස් සංගීත කණ්ඩායමට නිසි අවසර දුන්, වර්තමානයේ සී.ටී.ප්‍රනාන්දුගේ ගීතවල අයිතිය සතු සංගීතවේදී චන්දිමාල් ප්‍රනාන්දුටත් ස්තූතිය හිමිවිය යුතුයි.අවසාන වශයෙන් මේ ප්‍රසංගය ඩීවිඩී තැටියක් වශයෙන් එළිදැක්වීමට කටයුතු කරනවානම් එය සංගීතලෝලින්ට ඉතා වැදගත් වන බවද කිවයුතු වන්නේ නොඑසේනම් මෙතරම් වටිනා ගීත සමුච්චයක් අනාගතයට අහිමිවී යා හැකි බැවිනි.

Photography Courtesy - Jayasanka Fernando

නිර්මාලයා
Nirmal Ranasinghe Bmd.

"- සමන් කියයි - චරිත හයක වගතුග "

"සමන් කියයි". සමන් අතාවුදහෙටිටි ලියපු අළුත්ම පොත.සොඳුරු සැරිසර සරවක් නදිය දිගේ,සොඳුරු සැරිසර හනමිචිය දිගේ වගේ තමන්ගෙ සංචාරක සටහන් අළලා ලියූ පොත්වලට වඩා ටිකක් වෙනස් පොතක්.හැබැයි ඒවයෙ වගේම මේ පොතට පාදක වෙන්නෙත් ඔහු හා බැඳුණු රාජකාරි දිවියේ වගේම පෞද්ගලික දිවියේත් ඔහුට සමීප චරිත කීපයක වගතුග.හරි රහට ලියල තියෙනව.ඒ හින්දම පොත හතරපස් පාරක් කියෙව්වට පස්සෙ ඒ ගැන නිරායාසයෙන්ම විශ්ලේෂණය වෙලා මගෙ හිතට ආපු අදහස් ටිකක් තමයි මේ ලියන්නෙ.

සමන් අතාවුදහෙටිටි ගැන බොහෝ අය දන්නෙ නිවේදකයෙක් හැටියට.මට මතක විදියට පොඩිකාලෙ මම ඔහුගෙ හඬ හඳුනාගත්තෙ රූපවාහිනිය හරහා.අහපු දා ඉඳන් මම ඒ හඬට ඉරිසියා කරනව.!ලොබ බඳිනව.මට එහෙම කටහඬක් නැති එකට.ඒක ඒ තරම් ඒකීය, හරිම මටසිලිටි නිවුණු හඬක්.මෑත භාගයෙ ඔහුගෙ හඬ ඇහුවෙ සරත් දසනායකයන්ගෙ උපහාර උළෙලකදි.තරංගනී ශාලාවේදි ඔහු ඒ සභාවේ මෙහෙයැව්වේ එතන හිටි කාටවත් නොදැනෙනන විදියට.කිසිම කලබලයක් නැතුව.ඔහුගේ හඬ ගැන යම් සඳහනක් කළේ යම් විශේෂ හේතුවකට.

මෙන්න මේකයි හේතුව.පොත කියවද්දි සමන් අතාවුදහෙටිටිගෙ කටහඬ ගැන හිතේ තියාගෙන කියවනවිට මේ පොත ඔහුගේ හඬින් කියවීමට හැකිවීම තමයි මම අත්දැකපු සුවිශේෂී කාරණාව.වෙන අයටනම් කොහොම වෙයිද දන්නෙ නෑ.නමුත් මට නම් පොත කියවන්න ගත්ත වෙලේ ඉඳන් හිතේ මැවෙන්නෙ ඔහුගෙ කටහඬ.ඉතින් ඒ හඬින් මං හිතෙන් කියවනව.ඔහුගේ නිවේදක හඬට ඇලුම් කිරීම නිසාම මට එහෙම වෙනව ඇති කියන එකයි මගෙ අදහස.නැත්නම් වෙන කෙනෙක් ලියපු පොතක් කියවද්දිත් එහෙම වෙන්නෙපෑය.

අනික් කාරණේ මේ පොත ලියවිල තියෙන්නෙ කතා කරන බසින්.එක් එක් අවස්ථාවන්වලදී එකී චරිත ගැන ඔහු කළ දෙසුම් ඇසුරෙන්.ඉතින් ඔහුගේ හඬ සිතේ මැවෙන එක තවත් ලේසියි.හරි සරල බසක්.ආකර්ෂණීය බසක්.ඒ වගේම ඔහුටම ආවේණික විදියට ලියපු නිර්මාණශීලි ලිවීමක්.

"සමන් කියයි" කියල කිව්වට ඒ පොතේ තව අතුරු නම් කීපයකුත් තියෙනව.

මෙන්න මෙහෙම" ප්‍රේම් පොඩියි,දයා තරුණයි,නන්දා දුප්පත්,වික්ටර් ගැඹුරුයි,කළණි හයිබ්‍රිඩ්."

පොතේ විදියට සමන් අතාවුදහෙටිටියන් මේ චරිත හා කිටි කිටියේ ගැටගැහෙන හුය වෙන්නෙ ශ්‍රී ලංකා ගුවන්විදුලි සංස්ථාව.ඒ කාලේ බාසාවෙන් කිව්වොත් රේඩියෝ සිලෝන් එක.ඒ හැම චරිතයක්ම " ලොවින් එකෙක් එක් දෙයකට වෙයි සමත" කියන කතන්දරේ පුස්සක් කරපු අය.ඒක මේ අයගෙ මහා පොදු සාධකය.

දයාද අල්විස් ගත්තොත් ගේය පද රචිකාවියක්,මාධ්‍යවේදිනියක්,රේඩියෝ වැඩසටහන් ඉදිරිපත් කරන්නියක්.වික්ටර් රත්නායකයන් ගත්තොත් සංගීත ගුරුවරයෙක්,වාදන ශිල්පියෙක්,ගායකයෙක්,සංගීතඥයෙක්.නන්දා මාලිනිත් එහෙමයි.වයලීන් වාදක හයිබ්‍රිඩ් කළණිත් එහෙමයි.ප්‍රේමකීර්තිද අල්විස් ගැන කිසිවක් කියනවට වඩා නොකියා ඉන්න එක හොඳයි කියල මට හිතෙන්නෙ මනුස්සයෙකුට ඒ වගේ හැකියාවන් තියෙන්න පුළුවන්ද කියල මේක කියවන අයට අදහගන්න බැරිවෙයි කියන බයට.මේ චරිත පහේම හැකියා, දක්ෂතාවල හතර මායිම හරි විසාලයි.එය විටෙක විස්මය උපදවන වපසරියක්.

නිර්මාණශීලි බව,පවතින සාම්ප්‍රදායට එරෙහිව යාම, ඒ නිසාවෙන්ම නව්‍යතාවන් එළි දැක්වීම,ගීත රචනය,වාදනය,ගායනය,සංගීත අදියුරුවම වැනි කුමක් හෝ අංශයකින් සංගීතයට සම්බන්ධ වීම  වගේ කරුණු නිසාත් මේ අය එකම කුලකෙට වැටෙනව.

පොත තව ටිකක් විමසිල්ලෙන් කියෙව්වම පේන්න ගන්න මේ චරිත පහ අතරත් එකිනෙකාගෙ අන්තර් සම්බන්ධතා තියෙන බව.පෞද්ගලිකව වගේම රාජකාරි මට්ටමෙන්.අද කාලෙ බාසාවෙන් කිව්වොත් සෑහෙන කනෙක්ට් වෙච්ව, ලින්ක් වෙච්ච කට්ටිය.ඔන්න බලන්නකො.

නිරංජලා සරෝජනී ගයන අකලට වට මහා වරුසාවක් සේ කියන ගීතය ලියල තියෙන්නෙ දයා ද අල්විස්.සංගීතය සපයල තියෙන්නෙ නන්දා මාලිනී.එතකොට දයා ද අල්විස් ඇවිල්ල ප්‍රේම කීර්තිගෙ පළමු විවාහයෙ බිරිඳ."ආදරයේ උල්පත වූ අම්මා" කියන ගීතය ලියන්නෙ ප්‍රේමකීර්ති ද අල්විස්.ඒකෙ ගායනය වික්ටර් රත්නායකයන්ගෙ.වික්ටර් රත්නායකයන්ගෙ "ස" ප්‍රසංගයට නැතිවම බැරි වයලින් වාදකයෙක්ගෙ වෙන්නෙ කළණි පෙරේරා.

පොතේ චරිත පහක් ගැන කිව්වට මට හිතෙනව හයක් තියෙනව වගේ.මොකද සමන් අතාවුදහෙටිටි නෙ මේ කථාව කියන්නෙ.ඉතින් ඔහුගෙ චරිතයේ ඇතැම් කොටසුත් මේ පස්දෙනාගෙ කතා අතරට සමමෝසමේ කළවං වෙනව.සමනුත් එක්ක හයයි.ඒ මෙහෙමයි.එක තැනක් ඔහු කියනව "මගේ විවාහයේ දෙවනි මනමාලයා කළණි".!

මේ එක උදාහරණයක් විතරයි.තව එහෙම ඒවා සෑහෙන තියෙනව කියවගෙන යනකොට.ඒවගේම මේ චරිත ගැන කතා වෙන් වෙන් වශයෙන් කියවෙද්දි ඒ හරහා තව අතුරු චරිත ගණනාවක් පැන නඟිනව.බණ්ඩාර කේ.විජේතුංග, Asoka Tillekeratne, ලොකු මාස්ටර් හෙවත් තිලක සුදර්මන් සිල්වා,මහැදුරු ආරියරත්නයන්,අමරබන්දු රූපසිංහ,සේන වීරසේකර,කේමදාස මාස්ටර් වගේ තව චරිත ගණනාවක්.පොතේ තැනක අතාවුදයන් කියනව මේ අය එක්ක වරුවක් ගතකරනව කියන්නෙ මහා දැනුම් සම්භාරයක් උකහා ගැනීමක් කියල.අර මම කලින් කිව්ව කනෙක්ෂන්, ලින්ක් වගේ දේවල් හොඳට තියාගෙන තිබුණා කියන එකට ඒක හොඳ උදාහරණයක්.දූරකථන,අන්තර්ජාල නොතිබ්බ ඒ යුගයේ මේ වගේ මිත්‍ර සමාගම්,සංවාද සල්ලාප බහුලව තිබ්බ නිසාම තමයි ඒ වගේ රසවතුන් බිහි වෙන්නේ.නැත්නම් මේ පොතේ තියෙනව වගේ රසකථා කොහෙන් ලියවෙන්නද.? අද ඒ හැමදෙයක්ම තාක්ෂණයෙන් යටකරගෙන ගිහින්.

එහෙව් දැනුම් සම්භාරයක් සමන් අතාවුදහෙටිටිටත් තියෙනව කියන එක මේ පොත කියෙව්වම පැහැදිලියි.ඒක පුළුල් වපසරියක විහිදී ගිය හරි අපූරු දැනුම් සම්භාරයක්.රස කතා ගොන්නක් පිරිවරාගත්.වික්ටර් රත්නායකයන්ගෙ හා කළණි පෙරේරාගෙ සංගීත යොදාගැනීම් ගැන ඔහු ලියා තියෙන දේ දැක්කම ඒ බව වඩා සුපැහැදිලියි.තව කෙනෙක් කිව්ව දෙයක් අහගෙන හෝ ඉගෙනගෙන හෝ සංගීතය වගේ විෂයක් ගැන ඒ වගේ ලියන්න පොඩ්ඩක් හරි ඒක ඇඟේ තියෙන්නත් ඕන.නැත්නම් ඒ විෂය කරුණු ගැන ඒ විදියට ලියන එක ලේසි වැඩක් නෙවෙයි.

පොතේ තියෙන උපමාවනුත් එහෙමයි.එක් තැනක ප්‍රේමකීර්ති ගැන සඳහනක් කරන සමන් කියා සිටිනව ප්‍රේමකීර්ති දක්ෂ සිත්තරෙක් වග.

" පොඩි මාස්ටර් හොඳ සිත්තරෙක්.ඔහුගේ සිත්තරකම කවිකමටත් වඩා සැඟවිච්ච දෙයක්.ගුහා චිත්‍ර වගේ.ගුහාවට රිංගන්න අවසර තිබෙන දෙතුන්දෙනෙක්ගෙ පමණක් නෙත ගැටුණු ඒවා."ගුහා චිත්‍ර උපමාව හරි අපූරු උපමාවක්.

පොතේ තවත් තැනක ඔහු කියවන්නාගෙ කුතුහලය රඳවාගෙන ලියන්නෙ අපිට කියවන්න හදිස්සියක් ඇතිවන විදියට.ඔහු කියන විදියට ප්‍රේමකීර්ති ද අල්විස් තමන්ගේ මියයාම ගැන කලින් පවා දැනගෙන හිටි බව සාක්ෂි සහිතව පෙන්වා දෙන්නෙ ඔවුන් අතර ඇතිවූ කතාබහින් හා ප්‍රේමකීර්ති ලියූ දේ මතින්.

"සමන් කවදාවත් මට සුරංගිව පෝරුවට නග්ගන්න වෙන්නෙ නෑ."

ඒ වගේම දාස්පෙතියා කවිය,සිය දියණිය සුරංගිට ප්‍රේමකීර්ති විසින් තෑගි දුන් පොතක ලියූ සටහන සමන් අතාවුදයන් සිය නිගමනයන් ලෙස දිගහැර පෙන්වන්නේ කුතුහලය කියන දේ උපරිමව රඳවාගනිමින්.

"ඔබ යුවතියක් වන දින
මා පස් ගොඩක් පමණි..
දුවේ..එය පාගන්න."

රෙගේ ගායක බොබ් මාලේ, බීට්ල්ස් සංගීත කණ්ඩායමේ ජෝන් ලෙනන් වගේ අයත් එක්ක මටනම් සමතැන්හි තියන්න පුළුවන් කෙනෙක් ප්‍රේමකීර්ති ද අල්විස්.හේතුව ඔවුන් ජීවත් උනේ බොහොම සීමිත කාලයක්.මාලෙ අවුරුදු තිස් හයක්,ලෙනන් අවුරුදු හතළිහක්.නමුත් ඔවුන්ගේ නිර්මාණ කරපු කියපු දේවල් අදටත් පවතිනව.අද ඒවා වන්දනීයයි.ප්‍රේමකීර්තිත් එහෙමයි.ජීවත් උනේ අවුරුදු හතළිස් දෙකක් වගේ කාලයක් උනාට ඒ ඩිංග කාලෙට ඔහු කරපු නිර්මාණ ගැන අදත් සමාජයේ කතාවෙනව.තවමත් පවතිනව.ඒ වගේ පොඩි කාලෙකදි එහෙම නිර්මාණ කළාද කියල විස්මයෙන් අහනව.ඇයි සමන් කියන විදියට ඔහු ජීවිතේට පොතක් පත්තරයක් කියවනව දැකලම නෑලු.

ඉතින් ඔය වගේ රසකතා, ජීවිතේට ඉගෙනගන්න පුළුවන් දේවල්,ආදර්ශ වගේ දේවල් එක්ක මේ පොත එක හුස්මට කියවගන යන්න පුළුවන්.ඒ වගේම මේ පස්දෙනා සම්බන්ධ වෙච්ච ගීතවලට අදාළව ඇඳි කළුසුදු සිතුවම්වලිනුත් මේ පොත පොහොසත්.ඉතින් මේ පොතට පෙරවදන ලියූ සමන් අතාවුදහෙටිටි කියන තව කතාවක්.

" මා කියූ කතා අතුරින් පොත සඳහා මේ කතා පහම තෝරාගත්තේ ඇයිදැයි සමහරු මගෙන් ඇසූහ.සමහරවිට ඔබේ සිත තුළද ඒ ප්‍රශ්නයම ඇඳී තියෙන්නට පුලුවන."

"පොත කියවන්න.ඒ ප්‍රශ්නයට උත්තර ඇත්තේ පොතේ එන කතා පහ ඇතුළේමය."

හතරපස්වතාවක් පොත කියවල ඒකෙ කරුණු කාරණා මෙව්චල් කරල මේ වගේ සටහනක් ලිව්වට පස්සෙත් මගේ හිතේත් ඔය ප්‍රශ්නෙම ඉතුරුවෙලා තියෙනව.සමානකම්,අසමානකම්,සම්බන්ධකම්,විෂය පථයන් වගේ කරුණු එක්ක ගැටිල බලනකොට මට හිතෙනව මං ලියපු දේවල්වලවත් ඒ ප්‍රශ්නෙට උත්තරේ තියෙනවද කියල.මොකද ඒක හරියටම දන්න සමන් අතාවුදහෙටිටිනෙ.හම්බවෙච්ච දවසක අහන්න හිතාගෙන මෙයින් නතර වෙනව.

හැබැයි මට අනුව නමේ පොතේ ඔක්කොම ප්‍රධාන චරිත හයයි.සමන් එක්ක.!හැබැයි එයාට අනිත් අයට වගේ අර පොඩියි,තරුණයි,දුප්පත්,ගැඹුරුයි,හයිබ්‍රිඩ් වගේ වත්කම් බැරකම් ගතිගුණ කෑල්ලක් නැති නිසා ඒ පහට අලුතෙන් කෑල්ලක් මං දානව.ඒ මෙන්න මෙහෙම.

Prem පොඩියි
Daya තරුණයි. Nanda දුප්පත්
Victor ගැඹුරුයි Kalani හයිබ්‍රිඩ්

එතකොට සමන්...

"Saman අතීතකාමියි."

ඔව්.ඔහු රසබර අතීතකාමියෙක්.!

නිර්මාලයා
Nirmal Ranasinghe Bmd
18.02.2017