ලෝකෙ සමහර සින්දු තියනව කොයිතරං කල් ගියත් නොමැරෙන.ලංකාවෙත් තියනව.ඒවට අපි කියනව අමරණීය නිර්මාණ කියල.ඒවා ඉතිං ගලේ ගහලවත් මරන්න බෑ.ඒවා එවර්ග්‍රීන් හිට්ස්.
මේ කියන්න යන නිර්මාණෙත් එහෙම එකක්.කාලයක් තිස්සෙ මේ නිර්මාණයෙ රචකයා කවුද කියල හොයාගන්න ඕන උනත් ඒකට මට ටිකක් කල් ගියා.
දවසක් මං මගෙ අතිශය හිතවත් දිලීප මංගලගෙන් අහනව.
" අයියෙ ? සුනිල් අයිය කියන නෝනා මට අත වනනව කියන සින්දුවෙ මියුසික් කාගෙද ? සුනිල් අයියගෙමද ?
ඕක මං හෙන ආසම සින්දුවක්.( මට විතරක් නෙමේ බහුතරයකට එහෙමයි ) පැල් බැඳං නැටුවැකි.යන්තං ඇහුණත් නිකම්ම නැටවෙනව.ඉතිං ඕක දිලිප අයියගෙන් මං ඔහොම ඇහුවෙ එයා ෆෝම ජිප්සීස් කීබෝඩිස්ට් නේ.
අනික ජිප්සීස්ලගෙ ගොඩක් සින්දුවල තනු , සංගීතය එයාලගෙම ඒවා.හැබැයි මේ සින්දුවෙ සික්ස් එයිට් ඇරුණු කොට පොඩ්ඩක් අර ජිප්සීස් කලර් එක අඩුයි.ඒම ඩෞට්ටෙකක් තියාගන තමා මං එයාගෙන් එහෙම ඇහුවෙ.
" නෑ බං සුනිල් අයිය නෙමේ.වෙන කවුරු හරි ඒක කලේ.මට මතක නෑ."
" එතකොට ලිව්වෙ කවුද ?"
" ලිව්වෙ බං මට මතක විදියට ඩබ්ලිවු.ජයසිරි.. !"
" හෑං ! .. අනෙප්පලයං බං යන්න.. ඩබ්ලිවු ජයසිරි ලියයිද ඔය වගෙ බයිල සින්දුවක්..වෙන්න බෑ. ! "
ඩබ්ලිවු ජයසිරි සින්දු ලියනව කියල දැනං හිටියට ඒ ලිව්ව සම්භාව්‍ය මට්ටමේ ඒවත් එක්ක මේ වගෙ එකක් ලියයි කියල හිතන්න මට හිත දෙන්නෙම නෑ.හැබැයි ඉතිං කිව්ව කෙනා සුවර් හින්ද එහෙම නොහිතත් බෑ.
" නෑ බං... එයා වෙන්නෝන.මට ලාවට මතකයි.හරියටම මං හොයල බලල කියන්නං. "
" හා "
ඉතිං ඒ කතාව එතනිං ඉවරයි.අහන්නං කිව්වට එයාට තියෙන වැඩවල හැටියට ඕක අමතකයි.සුවර් !
හැබැයි දැන් මට පොඩි හරි ක්ලූ එකක් තියෙනව සින්දුව ලිව්ව කෙනා ගැන.ඩබ්ලිවු ජයසිරි !
-------------------------------
කාලය ඔහොම ගෙවිල ගිහින් මෑත දවසක සන්නස්ගල සර්ගෙ තැප්‍රොබේනියන් ගිය වෙලාවක ගෙනාව පොත් ගොඩක් අස්සෙ තිබිල මං ගන්නව කෙටි කතා පොතක් කියවන්න.
" දේශද්‍රෝහි බල්ලා "
ටොප් භාණ්ඩයක්.මරු කෙටි කතා හත අටක එකතුවක්.ලියල තියෙන්නෙ ඩබ්ලිවු.ජයසිරි.!
යකඩෝ මේ මනුස්සය රඟපානව, සින්දු ලියනව, ඇසිස්ටන් ඩිරෙක්ටිං කරනව, පොත් ලියනව තව මොන මොනවා කරනවද දන්නෑ.. මට හිතෙනව.අම්මප මාර පොරක්නෙ.බොහෝ ඇසූ පිරූ තැන් ඇත්තෙක්.
ඉතිං ඒක කියවල ඉවර වෙලා එහෙ මෙහෙ පෙරලනකොට පොතේ ඉස්සරහ පිටුවක තියෙනව ජයසිරි මහත්තයගෙ හෑන්ඩ්ෆෝන් නම්බරේ.
ඔන්න කාලයක් යට ගහල තිබ්බ රබර්බෝලෙ ආයම උඩ එනවා.
"නෝනා මටාත වනනවා. ! "
ජයලත් මනෝරත්න මහත්තයගෙ වේදිකා නාට්‍යය සංවිධානය කරපු අවස්තා කීපයකදිම මට එතුමව හම්බෙල තියනව.කවදත් ඔහු අමුතුම චරිත රඟපෑ අමුතුම චරිතයක්.මං දැක්ක ඉහල කැලිබර් එහෙක ඉන්න, පොඩි ආඩම්බරකමක් තේජසකුත් එක්ක විකල්ප ධාරාවට බරවෙලා ඉන්න මං ආස අයිකොනික් නළුවෙක්.ඒ හින්දම මොකක්දෝ බය පක්සපාතකමක් තියන හින්ද හම්බුන කිසිම දවසක කතාවට ගිහිල්ලත් නෑ.
ඉතිං දැං නොම්බරේ දැක්කම හිතෙනව කතා කරලම අහන්න.දවසක් දෙකක් ගියා.ඇහුවෙ නෑ.ඔන්නොහෙ කමක් නෑ සින්දුව ලිව්වෙ ඔබද කියල අහනව කියල ගත්තා කෝල්ලෙකක්.
එක රිං එකයි.එහා පැත්තෙන් ෆෝන්නෙක ඉස්සෙනව.අර සිනමාවෙ, වේදිකා නාට්‍යවල මට ඇහිල පුරුදු කටහඬ අනික් පැත්තෙන් ගලා එනව.
මං කවුද කින්ද මන්ද කියල කාලාන්තරයක් තිස්සෙ මට වදදීපු ප්‍රස්නෙ මං ඔහුගෙන් අහනව.
" ජයසිරි මහත්මය අර ජිප්සීස්ල කියන නෝනා මට අත වනනවා කියන සින්දුව ලිව්වෙ ඔබතුමාද ?"
මේ එතැන් සිට ඔහු මට කළ විස්තරය.
" ඔව් ! ඒක මං තමා ලිව්වෙ.සොමී රත්නායක කළානෙ ෆිල්ම්මෙකක් " චිට්ටී " කියල.ඒක කමෂල් ෆිල්මෙකක්.ඒක එහෙමට සක්සස් උනේ නෑ.කොටිම්ම මට බලන්න හම්බුනෙත් නෑ. !
ඉතිං ඕකට සින්දු දෙකක් ඕනය කියල ඒක ඩිරෙක්ට් කරපු සරත් ගුණරත්න මට කිව්ව.එකක් ලිව්ව සරත් ගුණරත්න.ඒක රූකාන්තයි ලතායි කියන " සියුමැලී .. සියුමැලි රෝස මලේ.. " සින්දුව.
තව එකක් ඕනයි කිව්ව කපිරිඤ්ඤ ස්ටයිල් එකට එන.ඒකට තමා " නෝනා මට අත වනනව " කියන සින්දුව මම ලිව්වෙ.ඒක ටිකක් දේශපාලන පැත්තට බර සින්දුවක්.සොමී තමා ඒකෙ පොලිටීෂන්ගෙ චරිතෙ කලේ.එයා පෙරහැරේ එනකොට ඔය සින්දුව කිය කිය, පපර බෑන්ඩ් ගගහ, ඩාන්ස් කර කර එන්න තිබ්බෙ.මම තමා එයාගෙ සපෝටර් විදියට රඟපාලා ළඟින්ම හිටියේ. ( මේ වීඩියෝ එකේ තියෙන්නෙ ෆිල්මෙකේ ඒ කොටස )
" ඉතිං ඕක ලියද්දි කපිරිඤ්ඤ ස්ටයිල් එක ගැන ඔලුවෙ තියං ලිව්වෙ.මොකද කපිරිඤ්ඤවල ලක්ෂණයක් තමා සින්දුවක් ගත්තම එකිනෙකට අසම්බන්ධිත ගී පද ලියවෙන එක.නමුත් අවසානයේ, සේරම එකට දාගත්තම එක් අර්ථයකට එකිනෙකට ගැලපිලා සමෝධානය වෙනව.අන්තිමට ගත්තම කපිරිඤ්ඤ සින්දුවල තනි අයිඩියා එකක් එනව.කපිරිඤ්ඤ පැටන් එකට කියල ඉල්ලුවම මං පොඩ්ඩක් ඒව ගැනත් ඔලුවෙ තියන් ලිව්වෙ."
ඔහු බොහොම නිරවුල්ව හරබර වචන සහිතව කතාව කියනව.
මනුස්සයෙක්ට මේතරම් ප්‍රතිභාවක්, ටැලන්ට් එකක් තියනවද ?
සන්තානම් මෑණියනේ මේ මාත් එක්ක කතා කරන්නෙ පතී මහත්තය අධ්‍යක්ෂණය කළ " බඹරු ඇවිත් " ෆිල්මෙකේ කේමදාස මාස්ටර් සංගීතවත් කරපු උදුම්බරා කියන හෙන සම්භාව්‍ය ගණයේ ගීතයේ පද රචකයා.සින්දුව කොයිතරම් හොඳට ලියවුනාද කිව්වොත් මාස්ටර් ඒ ලිරික්ස්වල එක වචනයක් එහෙ මෙහෙ කරල නෑලු.ඒ ඇරුණම ඩබ්ලිවු.ජයසිරි අතින් ලියවුණු මේ ගණයටම වැටෙන අමුතුම සින්දු ටිකක් තියෙනව.
ලංකාවෙ ෆිල්ම් මියුසික් වල මාස්ට පීස් එකක් උන "උදුම්බරා හිනැහෙනවා" කියන සෝන්ග් එක ලිව්ව මේ පුද්ගලයා, " නෝනා මට අත වනනවා " කියල ඕනම පාටියක්, ඕනම ෆෝරම් එකක් එක මොහොතින් අනික් පැත්ත ගහල නටෝල ගන්න පුලුවන් බජව් සින්දුවක් ලියනව.අරක සම්භාවය මේක පීචං ! ( සමහරක් අය ඒ කාලෙ ජිප්සීස් සින්දුවලට කිව්වෙත් එහෙම !)
මනුස්සයෙක්ගෙ ප්‍රතිභාව මේ වගෙ සහමුලින් වෙනස් අන්ත දෙකක් අතරෙ සැරිසරනවද ? ඒ වගෙ වපසරියක පැතිරෙනවද ? සාමාන්‍යෙන් ගීත රචකයො පවා ඒ ඒ ජොන්‍රාස්වලට කැඩිලනෙ ඉන්නෙ.හැබැයි මෙතන කතාව වෙනස්.ඔහුට මේ හැම සබ්ජෙක්ට් එකක් ගැනම පුදුම බහුශ්‍රැතකමක්නෙ තියෙන්නෙ.
මට කේමදාස මාස්ටර්ව මතක් උනා.ලංකාවෙ මියුසික් ඉන්ඩස්ට්‍රියෙ කොයිතරම් සම්භාව්‍ය ගණයේ මාස්ට පීස් කොයිතරං ප්‍රමාණයක් හැදුවත් මාස්ටර් ඒ කාලෙ එච්.ආර්. ජෝතිපාලයන්ටත් ගී තනු හැදුව.මොකද අද උදේ වෙනකොට හවා ඔහු වනමින් ඔහුගෙ සින්දු ඇහුනට ඔහුව වන්දනාමාන කලාට එදවස ඔහුව සැලකුවෙ පීචං තුට්ටු දෙකේ ගායකයෙක් විදියට.
" ආදර මල් පවනේ " , " උණට කොත්තමල්ලි දුන්න රෝසා ( ජෝති/ එම්.එස් ) " මාස්ටර් හදපු එච් ආර් ජෝතිපාල කිව්ව ඒව.බැලුවම මේත් එහෙම්මයි.අමුතුම අන්ත දෙහෙක සින්දු දෙකක් ලියල.
සින්දුව ගැන ඔහු බොහොම නිරවුල්ව දක්වපු අදහස්වලට ඔන්නොය වගෙ ප්‍රශ්න ටිකක් එක්ක පොරබදල මාව කැරකිල අතෑරියා වගෙ උනා.මේක කියවන අයටත් එහෙම හිතෙනව ඇති.
" සින්දුවට තනුව දාල මියුසික් කලේ කාලෝ විජේසිරි.ඔහු අපිට හිටපු දක්ෂ සංගීතවේදියෙක්.ඔහු ජීවත් උනේ කළුතර පැත්තෙ..ඔහු වැඩිය කොළඹ පැත්තෙ වැඩකටයුතු වලට සම්බන්ධ උනේ නෑ.අපෙ අය සම්බන්ධ කරගත්තෙත් නෑ වැඩිය.ආත්ම ලියනගේගෙ සින්දු පවා තියනව එයා කරපු." දැන් එයා නෑ.බීලමයි මලේ.සිරොසිස් හැදිල.නොසෑහෙන්න බිව්ව.බයිට් එකට ගත්‍තෙ වේලිච්ච මිරිස්.හරිම දක්ෂ සංගීතවේදියෙක්. "
" හැබැයි ඉතිං ෆිල්මෙක සක්සස් උනෙත් නෑ.සොමී රත්නායක ඇමරිකාවට යනකොට ඔය සින්දු දෙකම ජිප්සීස් සුනිල්ට වික්කා."
කතාලතා අවසන් වේගෙන එද්දි මම කිව්වෙම මට තාමත් ඔබ වගෙ කෙනෙක් මේ වගෙ සින්දුවක් ලිව්ව කිව්ව එක හිතාගන්න බැරි බව.අදහගන්න අමාරු බව.ඔහු මුකුත් කිව්වෙ නෑ.යාන්තං හිනාඋනා ඇහුන.
ඒ උනාට ඒක එහෙමයි." නෝනා මට අත වනනවා " කියන සින්දුව ලිව්වෙ ඩබ්ලිවු ජයසිරි.දැන් මට ඒක කන්ෆම්.
සින්දුවෙ බයිල කපිරිඤ්ඤ රිදම් එක පොඩ්ඩක් අමතක කරල ඩබ්ලිවු ජයසිරි ලිව්ව මේ වචන ටික අරං බැලුවොත් ඒකට යටින් පේන පොලිටික්ස් යටිපෙලක් තියෙනව.
මට අනුව නම් " ලෝරෙන්සෝ ඩි අල්මේදා කොලොම්තොටට යහපත් නාවිකයා " කියන තැනින්ම තමා මේ පොලිටික්ස් කෑලි පටන් ගන්නෙ.
නිකමට හිතන්න මෙන්න මේ පද ටික.
" රට වටේට ණය වෙනවා .. සුදිය මිසක් වෙන වැඩ නෑ..පියානෝ, ටැමරිං , බැන්ජො , මැන්ඩලිං ( ඒ කිව්වෙ ආතල් පමණයි ! ) " ඕක ලංකාවට ආදේශ කලාම කොහොමද ! ඒ කාලෙ හිටපු පොලිටික්ස් වැඩ කල නෝනලට ආදේශ කලොත් කොහොමද ! ගී පද ගැන පොඩ්ඩක් ගැඹුරින් කල්පනා කලාම නිකං මගෙ ඔලුවට ආව දේවල්.
"බ්‍රැන්ඩි බීල නොන්ඩි ගහල අම්බානක ගුස්ති දාල !" ....
අරින්න්නෙපා.. " එයා ඉඳන් කම් කම් කියනවා.. අපි ඔක්කොම නෝ නෝ කියනවාහ්හ්... නෝනා මටාත වනනවා.. "
ඔව්.. සුනිල් තාමත් " නෝනා මට අත වනනවා " සින්දුව ස්ටේජ්වල කියනව මං දකිනව.ඒක හැමෝම අතරෙ හරිම ජනප්‍රිය සින්දුවක් ඒක.
සමුගන්න කලින් ඔහු අන්තිමට කිව්වෙක ටිකත් හරිම වැදගත්.
" තාමත් සුනිල් ( ජිප්සීස් ) මට හැම අවුරුද්දෙම මගෙ රෝයල්ටි ෆී එක මට එවනවා." ❤❤
"බොහොම ස්තූතියි ජයසිරි මහත්තය මේ විස්තර නිහතමානීව මා එක්ක කිව්වට. " කියල මං සංවාදය අවසන් කළා.
නිර්මාලයා
https://youtu.be/Ypa8nduNO8o
#Gypsies
#nona
